Սերունդների կապը
Արամայիս Դանիելյան
Հրանտ Դանիելյան
Արամ Դանիելյան
Դավիթ Դանիելյան
Պապս՝ Արամայիս Դանիելյանը 1936 թվականին ձերբակալվում է Աղասի Խանջյանի մահվան մեջ հրապարակավ Լավրենտի Բերիային մեղադրելու համար, իսկ 1937 թվականին աքսորվում է Սիբիր:
Իր օրագրում գրում է.
«Երևանից մեզ լցրին վագոնները և տարան: Ճանապարհը սարսափելի էր: Երկաթե վագոնները ամբողջովին սառցակալել էին: Ոմանք տաք հագուստով ճամպրուկներ ունեին, սակայն ամբողջովին սառցակալել էին և չէին բացվում: Շատերը չդիմացան և ճանապարհին էլ մահացան, մյուսների դեմքը և վերջույթները ցրտահարվեցին: Երբ հասանք, նաչալնիկներից մեկը բղավում էր «среди вас есть художники?»: Ես գնացի նրա մոտ և ասացի՝ ես եմ: Ասաց հետևեմ իրեն, ես այդ պահին շատ վախեցա ու նույնիսկ փոշմանեցի, որ այդպես ասացի...
Երբ եկանք, ասացին որ մի բան նկարեմ, որպեսզի համոզվեն, որ նկարիչ եմ: Ես պատին նկարեցի մեր չքնաղ Սևանա լիճը և Արարատը: Նրանք գոհ մնացին, ասացին կմնաս տնտեսական բաժնում և լոզունգներ, ցուցանակներ կգրես: Երբեմն նաչալնիկները ինձ տանում էին իրենց կացարանների պատերին նկարելու, ես էլ փորձում էի դանդաղ նկարել, որովհետև իրենց մոտ տաք էր, ջեռուցվում էր:»
Եթե Արամայիս Դանիելյանը չունենար նկարելու շնորհ, գուցե չկարողանար ողջ մնալ և մենք էլ, որպես իր սերունդ չէինք լինի:
Հայրս՝ Հրանտ Դանիելյանը ունենալով բնատուր շնորհ, ստացել է նաև ակադեմիական որակյալ կրթություն գեղանկարչության ոլորտում: Սովորել է Մոսկվայի նկարչական համալսարանում և Կիևի նկարչական տեխնիկումում: Ստեղծագործել է Կապան քաղաքում և Կապան քաղաքի համար, անմահացնելով Սյունիքի խորհրդանիշ Խուստուփ լեռը, կապանյան գյուղերի կենցաղը, քաղաքային փողոցները և մթնոլորտը: Հորս արվեստանոցում ենք սովորել ստեղծագործել ես և եղբայրս՝ Արամ Դանիելյանը:
Արամ Դանիելյանը աբստրակտ ոճի գեղանկարիչ է, ում աշխատանքները հայտնի են Հայաստանում և Հայաստանի սահմաններից դուրս: Արամի աշխատանքները լայն կիրառություն ունեն ժամանակակից թվային և NFT ձևաչափերում:
Այսպես՝ Դանիելյան ընտանիքում արդեն 3 սերունդ գեղանկարիչներ են: Յուրաքանչյուր սերունդ իր ասելիքով, ձեռագրով և հետագծով փորձել է հարստացնել հայկական արվեստը:
Կարծում եմ, մեր ընտանիքում նկարիչների նոր սերունդներ լինելու են և այս շարքը դեռ շարունակվելու է: